ILOILO CITY – Nagapanawagan ang Commission on Elections nga may tatlo na gid lamang ka adlaw kag magatakop na ang registration sang Barangay kag Sangguniang Kabataan Elections.
Sa interview sang Bombo Radyo kay Mr. Jonathan Sayno, Election Assistant II sa Commission on Elections Iloilo City, iya ginpahayag nga may yara sang nabilin nga tatlo na gid lamang ka adlaw sa registration— subong nga adlaw sang Sabado; sa Lunes, Enero 30; kag sa Martes, Enero 31.
Suno pa kay Sayno, pito ka libo ang ila nga target nga marehistro apang sa subong, yara pa lang sa masobra sa apat ka libo ang nakaparehistro humalin sang Disyembre 12, 2022.
Sa subong suno kay Sayno, amat-amat na nga nagadamo ang numero sang nagaparehistro samtang nga nagahilapit na ang deadline.
Ang mga aplikante nga naga-edad 15-17 ang mahimo nga mag-register para sa Sangguniang Kabataan Elections samtang ang naga-edad 18 pasaka ang mahimo magparehistro bilang regular voters.
Lakip sa mga transaction nga ginabaton amo ang application for registration, transfer/ transfer with reactivation, reactivation, change/ correction of entries.
Ang Barangay kag Sangguniang Kabataan Elections ang patigayunon sa katapusan nga Lunes sang Oktubre subong nga tuig 2023.
