ILOILO CITY – Indi pa matul-id ni Governor Arthur Defensor, Jr. kun san-o maumpisahan ang repopulation ukon pagpadamo sang baboy sa probinsya sang Iloilo ilabi na sa mga nauna nga banwa nga nakarekord sang kaso sang African Swine Fever.
Sa interview sang Bombo Radyo kay Gov. Defensor, iya ginpahayag nga kinahanglan matapos anay ang reports halin sa Environmental Services kun bala negatibo na sa African Swine Fever ang mga nabilin nga baboy sa isa ka lugar.
Mahimo man nga makabutang anay sang sentinel pigs apang ini sila ang indi pa makabig nga for repopulation apang mahimo naman nga ibaligya.
Ang Department of Agriculture ang maybtara sang sentinel program kag may yara man ini sang pondo nga natalana apang suno sa gobernador, mahimo man nga makabulig ang Iloilo Provincial Government sa nasambit nga programa.
Mas maayo gid kuntani suno sa gobernador nga maislan ang mga baboy agud nga masiguro nga hilway na ini sa balatian.
Sa subong, may yara sang direktiba si Governor Defensor nga i-monitor ang inventory sang pork kag swine.
Base sa pagpangusisa sang gobernador, nagaduha-duha pa ang iban nga hog raisers nga magbakal sang idik bangud may yara pa sang risgo.
Ginalantaw sang gobernador nga tatlo ka bulan sumugod subong, mahimo na nga makaumpisa sang pag-ihaw ang mga hog raisers.
Indi man problema kun sa diin makabakal sang baboy pahayag niya kay ang mga probinsya nga nakapalibot sa Iloilo ang lunsay green zone man.
