ILOILO CITY – Kun magbulaganay, required gid nga may bawi-ay?
Hambal sang iban, ihatag nalang ato tanan sa iya.
May nagahambal man nga dapat nga bawion bangud nga wala ka na gani sang bilin kay ang tanan-tanan ginhatag mo na sa iya pero ginbayaan ka pa niya.
Sa Uganda, nagmandu ang korte sa isa ka babayi nga bayaran ang iya anay fiance sang masobra sa $2,800 ukon masobra sa P150,000 bangud sa pag-cancel sang ila engagement apisar nga gingastuhan sang lalaki ang iya pag-eskwela.
Ini ang kasunod sang pag-akusar sang lalaki sa babayi bangud sang natuga nga “inconvenience kag psychological anguish.”
Ang 64 anyos nga si Richard Tumwiine nga isa ka retired teacher ang nagbayad sang diploma in law ni Fortunate Kyarikunda sang sila ang engaged pa.
Apang, ang bataon nga si Fortunate ang ang nagpahayag nga indi niya mahimo nga magpakasal sa isa ka tigulang nga lalaki.
Bangud nga wala natuman sang babayi ang iya promisa nga magpakasal, entitled ang lalaki sang reimbursement.
Suno sa judge, dapat nga bayaran ni Fortunate sang masobra sa P139,000 ang gingasto sa iya ni Richard sa iya pag-eskwela.
Nagmandu man ang korte nga dapat nga bayaran ni Fortunate ang masobra sa P14,000 bilang general damages sa tagreklamo bangud sa huol kag psychological anguish.
Wala man naka-agi tambong ang babayi sa court proceedings kag wala man nakapasa sang iya paathag.
Suno kay Richard, tubtob san-o nga magapabilin sa iya tagipusuon ang kasakit nga tuga sang pagbiya sa iya ni Fortunate.
Ang desisyon sang korte ang ginpakamalaot naman sang women’s rights activist nga si Miria Matembe bangud nga one-sided ini.
Nagapakita lamang suno sa iya nga ang judicial system ang masami nga nagapabor sa mga lalaki.
