Nagbalik na kay Novak Djokovic ang trono bilang world number one sa tennis matapos naangkon ang iya ika-napulo nga Australian Open title paagi sa pagdominar sa final sa Melbourne Park subong nga tuig.
Ginbalabagan sang 35-anyos nga Serbian tennis superstar ang Grand Slam nga handum sang iya Greek nga kasumpong nga si Stefanos Tsitsipas paagi sa pag-secure sang 6-3 7-6(4) 7-6(5) victory.
Ini man ang ika-22 nga Grand Slam men’s singles title ni Djokovic nga subong tupong na sa rekord ni Rafael Nadal sang Spain, kag abanse naman sang duha sa 20 nga natipon sang Swiss great nga si Roger Federer.
Makabig man ini sang Djokovic fans nga ‘ultimate redemption’ kag ‘remarkable comeback’ bangud kun matandaan, sang nagligad nga tuig, wala siya nakahampang sa tournament kag gin-deport pa sa Australia bangud sa kontrobersiya sa iya nga Covid-19 vaccination status.
Mangin ang ten-time Australian Open champion ang nagakabig sini nga kadalag-an bilang “biggest victory” sa iya nga kabuhi.
“I have to say this has been one of the most challenging tournaments I have ever played in my life considering the circumstances, not playing last year, coming back this year,” suno kay Djokovic, isa sa ginakabig greatest of all time sa tennis.
Kaangay sa natabo sa semi-final match, wala man ang amay sini nga si Srdjan sa players’ box sa final matapos nga nadalahig ini sa kontrobersiya kasunod sang picture kun sa diin kaupod sini ang isa ka fan nga nagadala sang Russian flag nga naga-feature sang nawong ni Russian President Vladimir Putin.
Magluwas diri, nagsuprer man si Djokovic sang injuries sa sini nga edisyon sang Australian Open.
Ang ika-napulo nga tropeo ni Djokovic sa Australia ang nagdugang pa sa iya decorated career. Sa iya 22 ka major championships (kaangay sa rekord ni Nadal) ang ginakilala subong nga pinakamataas nga nahimo sa maragtas sang tennis. Lakip diri ang pito halin sa Wimbledon, tatlo sa U.S. Open, kag duha sa French Open.
Ang Australian Open ginahiwat kada tuig sa Melbourne Park sa Melbourne, Victoria, Australia. Ini nga tournament ang una sa apat ka Grand Slam tennis events nga ginapatigayon kada tuig nga ginasundan sang French Open, Wimbledon, kag US Open. ##
