ILOILO CITY – Posible nga magapatigayon pa sang ikaduha nga committee hearing ang Sangguniang Panlalawigan may kaangtanan sa reklamo sa atrasado nga paghatag sang sweldo, allowances kag benepisyo sang pila ka mga empleyado sang Western Visayas Sanitarium and General Hospital.
Sa interview sang Bombo Radyo kay Iloilo 2nd District Senior Board Member June Mondejar, iya ginpahayag nga wala pa lubos nga napadalman kun ano gid ang sitwasyon sa ospital.
Posible nga magadihon sang committee report si Mondejar kag iplastar ang ila mga rekomendasyon.
Sa ginpatigayon nga una nga hearing, wala nakatambong ang accountant nga si Mr. Conrad Sorongon nga amo ang ginatudlo sang hospital chief nga si Dr. Judy Ann Dumayas nga nagapa-delay sang benepisyo sang mga health workers.
Nakumpirmar ni Mondejar nga ang problema ang nagsugod na sang 2004 kag wala sa gihapon nasolbar tubtob subong apisar nga maka-anum na ka beses nga nagbaylo ang liderato sa ospital.
Nahibaluan nga nag-deliver sang privilege speech si Mondejar bangud sa reklamo sang madamo nga mga healthcare workers nga atrasado ang ila sweldo kag benepisyo.
Nagakabalaka ang opisyal nga posible nga maka-apekto sa operasyon sang ospital ang amo nga problema.
