ILOILO CITY – Nagdangat sa P4.7 million ang balor sang kahalitan nga natuga sang sunog nga nagluntad sa Barangays West Habog-habog kag San Juan, Molo, Iloilo City.
Sa interview sang Bombo Radyo kay Senior Fire Officer 1 Jake Ronald Solis, iya ginpahayag nga tuman ka lapad ang agi sang kalayo sa lugar.
Suno pa sa iya, naghalin ang kalayo sa isa ka magamay nga balay nga human sa light materials.
Sang amo nga tion, yara sa gwa ang tag-iya sang balay kag nakibot lamang sila nga may nagalinagatik kag hinali lang nga may nagsiga.
Sa inisyal nga imbestigasyon sang Bureau of Fire Protection, electrical in nature ang gintuna-an sang sunog.
Nahibaluan nga sa record sang City Disaster Risk Reduction and Management Office, 207 ka mga balay ang nagkalasunog sa West Habog-Habog, Molo kag sa sini nga numero, 204 ang totally burned kag tatlo naman ang partially burned.
207 ka pamilya ukon 811 ka mga indibidwal ang apektado sa sunog.
Sa San Juan, Molo naman, 85 ka mga balay ang nasunog kag sa sini nga numero, 72 ang totally burned kag 13 ang partially burned.
314 ka mga indibidwal ukon 91 ka mga pamilya ang apektado base sa validation sang City Disaster Risk Reduction and Management Office.
