ILOILO CITY – Magapatawag liwat sang special session si Iloilo City Mayor Jerry Treñas agud nga matigayon ang 7-cock derby sa Jaro Coliseum kadungan sa kapyestahan ni Nuestra Señora dela Candelaria.
Sa interview sang Bombo Radyo kay Mayor Treñas, iya ginpahayag nga ang pabulang ang kabahin na sang tradisyon sa syudad sa tion nga may kapistahan sa Jaro.
Suno pa sa alkalde, madamo ang naga-abot sa syudad agud nga magbulang bangud nga ini ang ginakabig nga pinakadako nga derby gani nagakadapat lamang nga alalayan ini sang syudad.
Sa isyu naman sang legalidad sang bulang, suno sa alkalde, sa iya pagpakig-angut sa director sang Commission on Elections sa Western Visayas nga si Atty. Dennis Ausan, mahimo nga magpatigayon sang bulang apisar nga may yara sang ongoing nga registration para sa eleksyon.
Suno pa kay Treñas, indi na presidential decree ang ginasunod kundi, election law na.
Base sa Presidential Decree No. 449 ukon Cockfighting Law of 1974, indi mahimo nga mapatigayon sang bulang sa Rizal Day, Philippine Independence Day, National Heroes Day, Holy Thursday, Good Friday, election ukon referendum day kag sa tion sang registration days para sa amo nga election ukon referendum.
Ang registration para sa Barangay kag Sangguniang Kabataan elections ang magatakup pa bwas nga adlaw, Enero 31.
Sa ginhingyo nga Resolution of No Objection sang Iloilo Sportsmen, Inc., ang 7-cock derby ang hiwaton kuntani sa Enero 31 tubtob sa Pebrero 2.
Ini ang ginbasura sang Iloilo City Council bangud sa paglapas sini sa Presidential Decree No. 449.
Gina-abi-abi naman ni Iloilo City Councilor Atty. Romel Duron ang plano ni Iloilo City Mayor Mayor Jerry Treñas nga magpatawag sang special session agud nga mahambalan ang 7-cock derby sa sa Jaro Coliseum kadungan sa kapyestahan ni Nuestra Señora dela Candelaria.
Sa interview sang Bombo Radyo kay Duron, chairman sang Committee on Games and Amusement sa Sangguniang Panlunsod, iya ginpahayag nga sang nagligad nga special session, wala pa niya nakumpleto ang iya paathag sa ginhingyo nga Resolution of No Objection sang Iloilo Sportsmen, Inc.
Suno sa iya, dapat kuntani nga nadiskusyunan ang amo nga hingyo bangud nga may yara man sang exemption sa prohibition.
Ang pabulang sa kapistahan sang Jaro ang ginakadtuan sang madamo nga tawo nga makabulig sa turismo sang syudad rason nga ginasuportahan ini ni Duron.
Sa pihak sang natabo sang nagligad nga session, ginpahayag sang opisyal nga ginarespeto niya ang iya mga kaupdanan kag wala siya sang kalain sang buot sa mga ini.
