Gina-proseso na sang Mandurriao Police Station ang kaso nga ipasaka batok sa duha ka pangayaw nga nadakpan kag nakuhaan sang ginapahayag iligal nga droga sa Barangay Bakhaw, Mandurriao, Iloilo City.
Ang mga naaresto amo sanday Rolando Gonzales, 37, residente sang Brgy. Rizal, La Paz kag Jovie Muana, 36, residente sang Brgy. Tabuc Suba, Jaro.
Ginapahayag nga isa ka sachet ang nakuha kay Gonzales, samtang duha naman ka sachet sang suspected shabu ang nakumpiskar gikan kay Muana.
Sa interview sang Bombo Radyo kay Pol. Col. Albert Sy, officer in charge sang Mandurriao Police Station, iya ginpahayag nga nadakpan ang duha samtang ginapatigayon sang pulis ang saturation drive sa anti-illegal drugs campaign sa amo nga barangay.
Nagtuyo pa nga magpalagyo ang duha suno kay Sy apang natigayon nga malagas sang pulis.
Ginkumpirma pa ni Sy nga si Gonzales amo ang isa ka subject nga nakapalagyo sang gin-conduct sang Lapaz Police Station ang isa ka drug buy bust sang nagligad nga Disyembre 2022.
Matandaan nga sa Bakhaw, Mandurriao man natabo ang pagdakop sa 32 ka mga persona sang nagligad nga semana sa isa ka ginapahayag boardinghouse-turned-drug den. ##
