ILOILO CITY – Padayon pa nga nagasaka ang kaso sang dengue sa probinsya sang Iloilo.
As of January 27, nagdangat na sa 90 ang kaso kun sa diin, 36 gid ang ginsaka humalin sang nagligad nga morbidity week.
Sa data sang Iloilo Provincial Health Office, ang lima ka mga banwa nga may pinakamadamo nga kaso amo ang Estancia nga may siyam; Barotac Nuevo nga may walo; Cabatuan nga may anum; Ajuy kag Alimodian nga may tag-lima.
Sa 42 ka mga banwa kag isa ka component city, 13 nalang ang wala sang may na-record nga kaso sang dengue.
Sa interview sang Bombo Radyo kay Dr. Ma. Socorro Quiñon, provincial health officer, iya ginpahayag nga liwat nga suguran ang programa sang probinsya nga Action Barangay Kontra Dengue.
Suno pa sa iya, ang masami nga pag-ulan ang isa sa mga rason sang liwat nga pagduging sang balatian.
Nagpanawagan naman ang Iloilo Provincial Health Office sa publiko nga gilayon magpakonsulta kun may ginasuprer nga sintomas sang dengue.
Sundon man ang 4S strategy nga amo ang search and destroy of mosquito breeding sites, securing self-protection, seeking early consultation, supporting fogging/spraying only in hotspot areas kag ang pag-obserbar sang safety and health protocols.
