ILOILO CITY – Nagpanugyan ang Iloilo City Health Office sa publiko nga likawan ang pagregalo sang tuman ka tam-is nga tsokolate sa tion sang Valentine’s Day.
Sa interview sang Bombo Radyo kay Dr. Althea Tampos, cardiologist sang Iloilo City Health Office, iya ginpahayag nga malain sa ika-ayong lawas sang tuman nga pagkaon sang matam-is bangud posible ini nga magtuga sang nagkalain-lain nga sakit sa tagipusu-on.
Apang suno sa iya, kun indi gid man malikawan ang paghatag sang tsokolate, mas maayo nga dark chocolate nalang ang pili-on.
Mahimo man nga red wine nalang ang ihatag.
Suno pa kay Tampos, dapat nga manubo lamang ang calorie intake kadungan sang pagselebrar sang adlaw sang mga tagipusu-on.
Para sa mga wala naman sang kaupod sa Valentine’s Day, nagpanugyan si Tampos nga dapat likawan ang mga bagay nga nagahatag sang stress sa kaugalingon kag palangga-on ang kaugalingon antes ang iban.
