ILOILO CITY – Nagpasar sang resolution si Iloilo City Councilor Ely Estante nga nagapangayo sang bulig kay President Ferdinand Marcos, Jr. para sa mga nasunugan sa Barangays San Juan kag West Habog-habog sa distrito sang Molo.
Sa interview sang Bombo Radyo kay Estante, iya ginpahayag nga sa resolusyon, nagapangayo ang syudad sang Iloilo sang bulig sa presidente para sa relokasyon sang 299 ka mga pamilya nga apektado sang sunog sa duha ka mga barangay sang Enero 28.
Ang mga nasunugan ang sa karon, yara sa Baluarte kag San Juan Elementary School.
Suno pa kay Estante, indi pa sigurado ang mga apektado nga pamilya kun makabalik pa sila sa lugar bangud pribado ang duta.
Apang, una na nga ginpahayag ni Iloilo City Mayor Jerry Treñas nga baklon sang syudad ang duta kag patindugan sang low rise building para mangin safe nga istaran sang mga pumuluyo sa barangay.
Dugang pa ni Estante, subong nga tion sang emerhensya, nagakinahanglan gid sang bulig ang mga residente nagikan sa pinakamataas nga opisyal sang pungsod nga amo ang presidente.
Ang kopya sang resolution ang ipadala man sa opisina nanday Iloilo City Lone District Representative Julienne Baronda, USWAG Ilonggo Party-list Representative Jojo Ang, Department of Human Settlement and Urban Development kag sang National Housing Authority.
