ILOILO CITY – Ginpakigbahin sang aktres kag socialite nga si Heart Evangelista ang iya appreciation sa iya bana nga si Senator Francis “Chiz” Escudero bangud nga very supportive ini kag gin-updan pa siya sa Paris para sa fashion week apisar nga indi niya ini hilig.
Suno kay Heart, dako nga bulig ang suporta ni Chiz agud nga mangin malipayon ini sa iya trabaho kag sa iya kabuhi.
Apisar nga nahuya, nauyunan naman sang aktres ang nangin topiko sang mga senador sang nagligad kun sa diin, naistoryahan ang relasyon nila ni Chiz.
Pahayag ni Heart, ang biggest lesson nga iya natun-an nagikan sa mga butang nga natabo amo nga mangin happy ang isa ka tawo kun ginabaton ang growth kag kun suportado ka sang mga tawo sa imo nga palibot.
Nahibaluan nga naggwa ang huring-huring sang nagligad nga tuig nga nagbulagay ang duha matapos nga ginkakas ni Heart ang apelyido ni Chiz sa iya mga social media accounts.
Apang, magkaupod nga nag-celebrate sang New Year ang duha kag nagpadulong sa Japan upod ang mga anak ni Chiz.
