ILOILO CITY – Halos 400 na ka mga hog farmers nga apektado sang African swine fever ang nahatagan sang financial assistance nagikan sa Iloilo Provincial Government.
Sa interview sang Bombo Radyo kay Dr. Darel Tabuada, Provincial Veterinarian, iya ginpahayag nga nagdangat na sa 393 ka mga hog farmers nagikan sa pito ka mga banwa ang nahatagan.
Ang pito ka mga banwa amo ang Oton, Alimodian, Leganes, Mina, New Lucena, kag San Miguel.
Nagdangat naman sa P3, 898, 000 ang balor sang financial assistance nga nahatag na.
Suno pa kay Tabuada, sunod nga hatagan ang mga hog farmers nagikan sa banwa sang Sta. Barbara.
Ang balor sang financial assistance nga mabaton sang farmers ang nakadepende sa kadamuon sang baboy nga napatay.
Ginpahayag man sang natungdan nga ang mga reports nga nabaton sang ulihi na nga bahin sang 2022 kag subong nga 2023, gina-ubrahan na sang dokumento agud nga makabaton man sila sang ayuda.
