Anilao, Iloilo – Yara na sa restrictive custody ang pulis nga nagluthang-patay sang iya bayaw sa Barangay Sta. Rita, Anilao, Iloilo.
Ini amo si Police Master Sergeant Rodel Rodriguez, imbestigador sang Anilao Municipal Police Station.
Ang natiruhan naman amo si Eduardo Demavivas Jr., 40, residente sang nasambit nga lugar.
Sa interview sang Bombo Radyo kay Police Colonel Noel Aliño, Director sang Iloilo Police Provincial Office, iya ginpahayag nga nagapabilin si Rodriguez sa kustodiya sang Anilao Municipal Police Station.
Matandaan nga gintuyo nga bun-on sang biktima ang iya amay nga si Eduardo Demavivas Sr.
Nagpangayo naman sang bulig si Demavivas Sr., kay Rodriguez.
Sang nagsugat-anay ang banas ni Rodriguez kag ni Demavivas Jr., diri na nga gintuyo niya nga labuon ang pulis.
Ini ang nagresulta sa pagluthang sang pulis kay Demavivas Jr. nga amo gintunaan sang iya kamatayon.
Kaangot sini, gin-athag naman ni Aliño nga nagdepensa lang ang pulis sa iya kaugalingon.
Natalana naman nga ipaidalom sa paraffin test ang pulis kag ipaidalom naman sa ballistic examination ang armas sini.
