ILOILO CITY – Ang normal nga edad sang naga-gradwar sa junior high school diri sa Pilipinas amo ang 16.
Apang, napa-wow naman ang kalibutan bangud sa Pennsylvania, isa ka siyam ka tuig nga bata nga lalaki ang naka-graduate na sa high school.
Ang handum ni David Balogun nga mangin isa ka astrophysicist ang dali nalang niya nga malab-ot.
Nagsugod si David sa pag-eskwela sa Harrisburg-based Reach Cyber Charter School bilang grade three kag subong, ginhatagan sang high school diploma matapos nga nakumpleto ang iya mga klase nga ginpatuman online sa ila puluy-an sa Bensalem.
Suno sa iya, gusto niya nga himuon ang isa ka bagay bangud nga may abilidad ini kag masarangan.
Indi lang brainy si David, abaw…. athlete pa ini. Ginatinguha-an niya nga makuha ang iya black belt sa karate.
Nakumpleto na niya ang isa ka semester sa Bucks County Community College kag nagaplano nga magpangita sang isa ka kolehiyo ukon unibersidad agud nga maka-eskwela sang apat ka tuig.
Gusto gid ni David nga tun-an ang black holes kag mga supernovas.
