ILOILO CITY – Opisyal na nga nagpungko ang bag-o nga acting commander sang 301st Infantry Bayanihan Brigade sa Camp General Adriano D Hernandez sa Dingle, Iloilo.
Ginbuslan ni Colonel Michael Samson ang iya mistah nga si Brigadier General Marion Sison nga nagapungko subong bilang assistant division commander sang 3rd Infantry Division.
Sa interview sang Bombo Radyo kay Colonel Samson, iya ginpahayag nga magatutok ini sa pagpanglagas sa mga nagatuga sang kinagamo ilabi na ang armado nga grupo nga Communist Party of the Philippines–New People’s Army.
Pabaskugon man sini ang partnership upod sa mga ahensya sang gobyerno sa patag sang Humanitarian Assistance and Disaster Response.
Si Samson ang tumandok sang Negros Occidental kag myembro sang Philippine Military Academy “Sambisig” Class of 1991 kag anay brigade commander sang 303rd Brigade sa Camp Major Gerona, Brgy Minoyan sa Murcia, Negros Occidental.
Ang turn over of command ceremony ang ginpamunuan ni Lieutenant General Benedict Arevalo, ang Visayas Command chief kag concurrent 3rd Infantry Division commander.
