Nakaagi ka na bala sang klase sang heartbreak nga wala ka halos sang maobra kag hibi lang ang imo masarangan?
Subong nga nagahilapit ang Valentine’s Day, agaw-atensyon ang ginahimo sang isa ka hotel sa Cebu para sa ila mga empleyado nga broken-hearted.
Lakip diri ang mga binayaan, gin-luiban, ginbaylo, kag iban pa nga makasulumpa nga mga hitabo sa patag sang paghigugma.
Ini nga hotel ang nagatanyag sang lima ka adlaw nga “paid breakup leave” sa ila broken-hearted employees.
Suno sa management sang Cebu Century Plaza Hotel, indi mahapos nga bayaan, pero at least, makabulig sila sa pag-move on.
Gin-share man sang chief executive officer nga halin ini nga ideya sa iya personal nga eksperyensya; sang una suno sa iya, bangud sa malain nga relasyon, naga-duty siya nga lutang ukon wala sa kaugalingon gani apektado gid ang iya nga trabaho.
Nagapati man siya nga indi productive ang iya staff kun broken-hearted gani pwede sila maka-leave sa sulod sang lima ka adlaw bangud lima ka adlaw man ang iya ginapatihan nga healing period.
Lakip sa breakup leave amo ang beauty package nga may pa-facial treatment kag body scrub!
Bisan probationary employees suno sa management, mahimo man maka-avail sa sini nga offer.
Ginapahayag nga ang regular employees ang mahimo nga maka-avail sang lima ka mga “paid breakup leave” kada tuig sa kondisyon nga lain-lain man ang ila lover nga ginahibian. ##
