ILOILO CITY – Na-record sa Western Visayas ang pinakamataas nga inflation rate sa pungsod.
Sa data nagikan sa Philippine Statistics Authority, sa bulan sang Enero subong nga 2023, ang inflation rate sa Western Visayas ang nagdangat sa 10.3 percent.
Sa interview sang Bombo Radyo kay Miguel Gallego, Statistical Specialist II sang Philippine Statistics Authority- Region VI, iya ginpahayag nga apisar nga nagnubo ini nagikan sa 10.5 percent sang Disyembre 2022 matapos ang 10 ka sunud-sunod nga bulan nga paglala, ini naman ang pinakamataas sa bilog nga Pilipinas.
Nakita ang pagsaka sa commodity groups kaangay sang housing, tubig, kuryente, langis kag iban pa nga gatung, furnishings, household equipment kag routine household maintenance, health, transport, information and communication, personal care, kag miscellaneous goods and services.
Samtang, suno kay Gallego, ang paghina sang inflation sa rehiyon ang bangud sa pagnubo man sang annual growth nga na-record sa food and non-alcoholic beverages nga may 10.6 percent nagikan sa 11.1 percent sang December 2022.
Ini ang ginasundan sang restaurants kag accommodation services nga nagnubo sang 8.8 percent nagikan sa 9.7 percent sang nagligad nga bulan.
Nagasunod ang clothing and footwear nga may inflation rate nga 3.4 percent sang January 2023, nagikan sa 3.5 percent.
