ILOILO CITY – May patigayunon nga 12 ka oras nga scheduled power interruption ang National Grid Corporation of the Philippines sa pila ka bahin sang syudad kag probinsya sang Iloilo sa Domingo, Pebrero 12.
Sa interview sang Bombo Radyo kay Reagan Alcantara, lead specialist sang Public Relations Department sang National Grid Corporation of the Philippines, iya ginpahayag nga ini ang magasugod alas-sais sa aga kag magalawig tubtob alas-sais sa gab-i (6am-6pm).
Ang apektado amo ang City Proper kag Molo Substations sang MORE Electric and Power Corporation kag Pavia Substation sang Iloilo 1 Electric Cooperative.
Ang rason sang power interruption suno kay Alcantara amo ang patigayunon nga preventive maintenance work sa 100MVA Transformer No.1 kag High Voltage Equipment sa substation sang National Grid Corporation of the Philippines.
