ILOILO CITY – Ginbalibaran sang Filipino pole vault star nga si EJ Obiena ang mga donasyon nagikan sa iya mga supporters kasunod sang iya pag-anunsiyo nga indi ini makapasakop sa Asian Indoor Athletics Championships bangud sang logistical kag financial issues.
Apisar nga grateful sa suporta sang iya fans, ginpahayag ni Obiena nga natungdan na sang mg fans ang ila nga responsibilidad pinaagi sa pagbayad sang buwis nga amo ang gingamit niya sa iya mga trainings kag competitions sa Europe.
Suno sa iya, ‘double dipping’ na kag indi ‘ethical’ kung batunon pa niya ang mga donasyon nagikan sa mga tax payers.
Una na nga ginbuyagyag ni Obiena nga nagpaandam ang mga myembro sang iya team nga magbiya na bangud nga wala pa nakabaton sang sweldo sa sulod sang masobra isa ka tuig.
Apang ang world No. 3 ang nagapati nga maplantsa ang problema pinansyal.
Sa pihak sini, ginapahayag niya nga maswerte siya sa iya mga supporters nga handa nga maghatag sang kwarta agud lamang nga mabuligan ang iya pole vault career.
Si Obiena ang nakadaog na sang tatlo ka gold medals sa indoor season.
