ILOILO CITY – Nagapadayon ang paglibot sang Iloilo Provincial Health Office sa mga kabanwahan sa probinsya agud nga magpatigayon sang advocacy program agud nga malikawan ang dengue.
Sa pinakaulihi nga datos nagikan sa Iloilo Provincial Health Office, nagdangat sa 116 na ang kaso sang dengue sa probinsya subong nga tuig kun sa diin, ang Estancia ang may pinakamadamo nga may 13.
Sa interview sang Bombo Radyo kay Ma. Jennifer Joy Oñate, health education promotion officer II sang Iloilo Provincial Health Office, iya ginpahayag nga nagpadulong na sila sa mga banwa sang Estancia, Barotac Viejo, Sta. Barbara, kag Oton para sa advocacy program.
Dugang pa niya, indi lang pagpatigayon sang advocacy program ang ila ginahimo kundi, gina-monitor man kun ano ka preparado ang tagsa ka mga rural health units kag ang mga ospital malapit sa banwa nga may madamo sang kaso.
Lakip man sang ila nga gina-discuss amo ang nagasaka man nga kaso sang hand, foot, and mouth disease.
Sa subong nga nagbalik na sa eskwelahan ang mga kabataan, nagakadapat suno kay Oñate nga pabaskugon pa ang kampanya batuk sa dengue pinaagi sa pag-practice sang 4S kontra dengue.
