Nagapabilin nga undefeated ang Filipino middleweight prospect nga si Eumir Marcial matapos gintumba ang beterano nga si Ricardo Villalba sang Argentina sa ikaduha nga round sang eight-round middleweight bout sa Alamodome sa San Antonio, Texas, USA.
Duha ka beses nga gintumba ni Marcial ang 33-anyos nga kasumpong antes nakuha ang technical knockout win sa ikaduha nga round.
Ini na ang ikaapat niya nga career win sa pro ranks.
Suno sa 27-anyos nga Tokyo Olympics bronze medalist, nareyalisar niya nga daku ang iya natun-an sa iya nauna nga tatlo ka professional fights kag ini ang gingamit agud malutos ang mas eksperyensyado nga kasumpong.
Matandaan nga ginlutos ni Marcial via unanimous decision ang Amerikano nga si Steven Pichardo sang Oktubre 2022; nagdaog sang Abril 2022 matapos ginpatulog si Isiah Hart; kag daog man via unanimous decision batok kay Andrew Whitfield sang 2020.
Ang stoppage win ni Marcial batok sa Argentinian boxer ang nagakahulugan nga nag-improve na ang iya professional boxing record sa 4-0 nga may 2 knockouts samtang si Villalba naman ang nagnubo sa 20-8-1 nga may 8 knockouts. ##
