Iloilo City – Ginatugyan na sa mga kapulisan ang mga bag o nga mga motorsiklo, bala kag armas agud pasangkaron ang kalidad sini sa pagpahugot sang seguridad sang publiko.
Ini matapos ang ginpatigayon nga Blessing kag Turn-over sang Philippine National Police Equipment kadungan sang ika-32 nga Foundation Day sang talatapan.
Nahibaluan nga lakip sa mga kagamitan nga gintugyan amo ang 45 ka mga units sang motorsiklo, 600 units sang 9mm pistol, 5 units sang machine gun kag 40,000 rounds sang ammunition.
Sa interview sang Bombo Radyo kay Police Brigadier General Leo Francisco, director sang Police Regional Office 6, iya ginpahayag nga sang 2018 pa ang ulihi nga distribusyon sang mga kagamitan, kag subong gid lamang nga tuig liwat nahatagan sang kahigayunan.
Suno kay Francisco, ini ang kabahin sa pagpanikasog sang Philippine National Police kag Police Regional Office agud mapakita ang ikasarang agud mahatagan sang maayo nga serbisyo ang publiko.
Samtang, nagtambong sa amo nga selebrasyon si 4th District Representative Ferj Biron nga nagpanguna sa pagbusisi sang mga kagamitan.
