ILOILO CITY – Madamo sang indi kuntento sa traffic management sa syudad sang Iloilo.
Base sa scientific survey nga ginpatigayon pinaagi sa pag-interview sa 300 ka mga Ilonggo nga naga-edad 18 anyos pasaka kag botante sang syudad nagikan sa 60 ka mga barangay humalin sang Pebrero 3-5, 2023, nakakuha sang poor ukon -12% ang pagdumala sang trapiko sa syudad.
Sa interview sang Bombo Radyo kay Mr. Jeck Conlu, pinuno sang Iloilo City Public Safety and Transportation Management, iya ginpahayag nga wala pa man nakagwa ang resulta sang survey, ginalauman na sang iya opisina nga manubo ang ila nga rating.
Suno kay Conlu, isa sa dako nga mga pagtilaw sa isa ka regional center kaangay sang syudad amo ang traffic management.
Posible suno sa natungdan nga sang ginpatigayon ang survey, mainit nga issue ang pagpugok sang trapiko sa Ungka Flyover, madamo sang ginapatigayon nga road rehabilitation kag ginakay-o nga mga drainage systems.
Bangud sini suno kay Conlu, kinahanglan nila nga kay-uhon pa ang ila serbisyo kag dugangan ang intervensions.
Subong nga tuig, nag-hire sang dugang nga mga traffic aides ang syudad agud.
Sa bahin sang Ungka flyover, ginpahayag ni Conlu nga bastante ang numero sang traffic aide sa lugar kag naghagan-hagan na ang pagpugok sang trapiko.
Nahibaluan nga ang ini nga survey ang gingastuhan mismo ni Iloilo City Mayor Jerry Treñas agud nga mahibaluan ang assessment sang mga Ilonggo may kaangtanan sa mga serbisyo sang Iloilo City Government.
