ILOILO CITY – Gina-review na sang Iloilo City Public Safety and Transportation Management ang mga pangalan sang mga kritiko nga imbitaron sang talatapan agud nga maghatag sang walo ka oras nga lecture kag field demonstration.
Ini ang kasunod sang mandu ni lloilo City Mayor Jerry Treñas nga padal-an sang sulat kag imbitaron ang mga mabaskog nga kritiko sang Public Safety and Transportation Management Office agud nga maghatag sang lecture sa mga traffic aides.
Ginpahayag man ni Mayor Treñas nga personal niya nga gastuhan ang honorarium sang sini nga mga kritiko.
Sa interview sang Bombo Radyo kay Mr. Jeck Conlu, pinuno sang Iloilo City Public Safety and Transportation Management, iya ginpahayag nga indi pa niya mahingadlan ang mga mabaskog nga kritiko sang iya opisina.
Suno kay Conlu, bukas gid talatapan agud pamatian ang eksperto nga opinyon sang mga kritiko.
Sa tion nga may maggwa nga issue sa trapiko suno kay Conlu, nagaguluwa man ang mga eksperto.
Apang, indi man sigurado si Conlu kun bala, may yara sang ekspyeryensya ang ini nga mga kritiko.
Pahayag pa sang natungdan, indi naman bag-o sa ila ang mga kritisismo apang may yara gid sang mga nagalapaw na sa limitasyon.
