ILOILO CITY – Nagapadayon ang advocacy program sang Iloilo Provincial Health Office kasunod sang pagdeklarar sang outbreak sang hand, foot, and mouth disease sa probinsya.
Base sa data sang Iloilo Provincial Epidemiology and Surveillance Unit, nagdangat sa 1,647 ang kaso nga na-record humalin sang Enero 1 tubtob Pebrero 11 kun sa diin, 1,500 gid ang naga-edad sang isa tubtob 10 ka tuig.
Sa interview sang Bombo Radyo kay Ma. Jennifer Joy Oñate, Health Education and Promotion Officer II sang Iloilo Provincial Health Office, iya ginpahayag nga nagpatigayon na sila sang meeting upod ang mga manunudlo agud nga hambalan ang hand, foot, and mouth disease.
Magluwas sina, nagapadulong man sila sa mga eskwelahan agud nga magpatigayon sang lecture.
Nagapadayon man ang ila monitoring kag ginadungan sa Oral Health Month programs.
Nagpanugyan si Oñate sa mga ginikanan nga sa tion nga makitaan sang sintomas ang bata, gilayon ini nga i-isolate kag indi anay pagpaeskwelahon.
Pila sa mga sintomas sang hand, foot, and mouth disease amo ang pagpangatol sang tutunlan kag blisters sa nagkalain-lain nga parte sang lawas.
Sa subong nagapabilin naman nga mataas ang kaso sang amo nga balatian sa mga banwa sang Sta. Barbara, Alimodian, Barotac Viejo, Badiangan, Sara, Passi City, Banate kag Tigbauan.
