Iloilo – Nagdugang ang banwa sang Zarraga, Iloilo sa mga banwa nga ginpaidalom sa red infected zone bangud sa African Swine Fever.
Matandaan nga yara man sa Red Zones ang mga banwa sang Oton, San Miguel, Leganes, New Lucena, Alimodian, Santa Barbara, Mina, Barotac Nuevo, Dumangas, Banate, Janiuay, Barotac Viejo, Dingle, Batad, kag San Dionisio.
Sa interview sang Bombo Radyo kay Atty. Dennis Ventilacion, Iloilo Provincial Administrator, iya ginpahayag nga kaangay sa mga infected nga kabanwahan, may yara man sang igapahamtang nga mga checkpoint sa banwa sang Zarraga kun sa diin hugot nga ginadumilian ang magpasulod kag magpagwa sang baboy sa lugar agud malikawan ang paglapta sang African swine fever.
Nahibaluan nga nalakip sa ginadumilian amo ang buhi nga mga baboy kag pork products kaangay sang fresh/frozen pork products kag uncooked processed pork products.
Nagpanawagan ang natungdan sa publiko nga nagakadapat nga magsunod ang tanan sa health protocols agud malikaw ang paglapta sang african swine fever sa bug-os nga probinsya sang Iloilo.
