Iloilo City – Arestado ang tatlo ka myembro sang isa ka pamilya sa ginpatigayon nga drug buy bust operation sa Iloilo City Proper.
Ang mga nadakpan amo sanday Roger Sabado, 59; Dexter alyas “Ar-ar” Sabado, 28; kag Romar Sabado, 35 kag lunsay mga residente sang Barangay Hipodromo, Iloilo City Proper.
Sa interview sang Bombo Radyo kay Police Captain Mavin Laraño, hepe sang Iloilo City Police Station 1, iya ginpahayag nga narekober sa mga durugista ang 10 tanan ka sachet sang suspected shabu, buybust money nga P2,500 kag mga drug paraphernalia.
Suno kay Laraño, nagabug-at sang duha ka gramo ang narekober nga droga nga ginabulubanta nagabalor sang P13,600.
Nahibaluan nga indi ini ang una bes nga nadakpan sang mga kapulisan ang mga suspetsado kun sa diin ginakabig ang mga ini nga high value individual.
Yara na karon ang mga ini sa kustodiya sang Iloilo City Police Station 1 kag magaatubang sang kaso nga paglapas sa Republic Act 9165 ukon ang Comprehensive Dangerous Drugs Act of 2002.
