Nalutos ang Kaya Football Club-Iloilo sa una sini nga home game subong nga tuig nga ginpatigayon sa Iloilo Sports Complex.
Nangibabaw ang Dynamic Herb Cebu, 3-2, sa hampang matapos ang goal nanday Daniel Gadia, Leaford Allen, kag Jacob Liao.
Isahanon naman ang league top scorer nga si Daizo Horikoshi nga naka-goal para sa Iloilo-based club sa ika-35 kag ika-60 nga minuto sang hampang.
Nangin talalupangdon man sa match ang tensyon antes ang half-time matapos ginpaguwa-an sang red card sanday Gadia kag Kaya defender nga si Simone Rota kasunod sang foul nga nakomiter sang Cebu midfielder.
Ini ang una nga kalutusan sang Kaya sa home soil halin sang 2018.
Antes ang hampang sa Iloilo Sports Complex, nakasambuwa na ang Kaya kag ang Dynamic Herb sang makaduha ka beses kun sa diin Kaya ang daog sa una nga encounter sa Rizal Memorial Football Stadium samtang nagbawi naman ang Dynamic Herb sa ikaduha nga pagkitaay sa Cebu City.
Bangud sa kadalag-an sa resumption sang 2022-2023 Philippines Football League, nag-improve na ang Cebu sa 24 points, anum ka puntos nga mas manubo sa 30 ka puntos sang Kaya nga amo ang yara subong sa pinakaibabaw sang standings. ##
