ILOILO CITY – Gin-imbitar ni Iloilo City Mayor Jerry Treñas si Iloilo Public Information and Communications Affairs Office Mr. Nereo Lujan nga magpatigayon sang walo ka oras nga lecture kag field demonstration may kaangtanan sa trapiko sa syudad sang Iloilo.
Sa interview sang Bombo Radyo kay Treñas, iya ginpahayag nga magluwas sa mga traffic experts nagikan sa Metropolitan Manila Development Authority, imbitaron man ang mga local experts kag unahon anay si Lujan.
Suno pa sa alkalde, mahimo gid nga mag-lecture si Lujan sa adlaw sang Sabado kun sa diin, wala sang opisina.
Personal nga bayran ni Treñas ang P5, 000 nga honorarium para kay Lujan.
Nagalaum ang alkalde nga maga-improve ang traffic situation sa syudad kun matapos na ang lecture ni Lujan nga isa sa mga mabaskog nga kritiko sang traffic management sang syudad.
Sa tion nga indi naman mag-improve matapos ang lecture ni Lujan, mangita naman sang iban nga eksperto ang syudad.
Naka-depende na kay Mr. Nereo Lujan kun batunon niya ang imbitasyon ni Iloilo City Mayor Jerry Treñas nga magpatigayon sang lecture kag field demonstration sa mga traffic aides sa syudad.
Ini ang sabat sang gobernador matapos nga ginpahayag ni Treñas nga i-lisensya niya anay si Lujan sa natungdan.
Sa interview sang Bombo Radyo kay Governor Defensor, iya ginpahayag nga na-settle na niya sa alkalde sang nagligad ang una nga pahayag ni Treñas may kaangtanan sa empleyado sang provincial government nga mabaskog nga kritiko sang traffic management sang syudad.
‘NO COMMENT’
Nagngirit lamang si Mr. Nereo Lujan sang ginpangayuan sang sabat sa imbitasyon ni Iloilo City Mayor Jerry Treñas.
Sa baylo, nagpakigbahin ini sang picture sa social media nga nagapakita sang sulat nagikan sa Deputy Ombudsman for the Visayas.
Santu sa post ni Lujan, ginkwestiyon sini si Mr. Jeck Conlu sang Public Safety and Transportation Management Office bangud daw kaangay nga ginbasol ini sa palpak nga traffic management sang syudad bangud lamang sang inquiry nga ginhimo niya sa mga polisa sang trapiko sa syudad.
Dugang pa niya, daw kaangay nga gin-personal ni Conlu ang amo nga inquiry kag wala pa naka-move on.
‘WALA NAGA-PERSONAL’
Samtang, sa interview naman sang Bombo Radyo kay Mr. Jeck Conlu, iya ginpahayag nga wala siya nagapang-personal kag sa pagkamatuod, wala niya ginpahibalo mangin sa kay Mayor Jerry Treñas nga may inquiry si Lujan sa Ombudsman kag sa Civil Service Commission.
Dugang pa niya, indi siya ang naghatag sang rekomendasyon sa alkalde sa kun sin-o ang imbitaron nga maghatag sang lecture.
Nakahanda man si Conlu nga magbulig kag magpamati kay Lujan sa tion nga magpatigayon ini sang lecture.
