ILOILO CITY – Nagahulat sa gihapon si Iloilo Governor Arthur Defensor, Jr. sang sabat nagikan sa Philippine National Police may kaangtanan sa masunod sa director sang Iloilo Police Provincial Office.
Sa tatlo ka mga opisyal nga gin-recommend sang Philippine National Police, napili-an ni Governor Defensor ang isa ka Ilonggo nga si Police Colonel Ronaldo Palomo.
Napasa na sang Police Regional Office VI sa Camp Crame ang sabat sang gobernador apang wala pa sa gihapon sang gin-designate nga director.
Sa interview sang Bombo Radyo kay Defensor, iya ginpahayag nga wala siya sang problema kay Police Colonel Noel Aliño nga subong officer in charge sang Iloilo Police Provincial Office apang may ginasunod lamang nga proseso.
Dugang pa niya, indi man maglayo ang performance ni Aliño kag ni Palomo.
Indi man suno sa iya konsiderasyon ang pagka-Ilonggo sa pagpili sang director.
