ILOILO CITY – Gin-ako ni Miss Universe Philippines 2020 Rabiya Mateo nga nag-propose sang una ang iya ex-boyfriend nga si Neil Salvacion.
Ini ang ginbuyagyag ni Rabiya sang ginpamangkot kun bala, ginbulagan niya si Neil para sa korona.
Suno kay Rabiya, wala niya ginbaton ang proposal ni Neil tubtob nga nagdangat sa breakup.
Paathag niya, 23 anyos pa lamang siya sang amo nga tion kag madamo pa sang handum para sa iya pamilya gani, indi pa ini handa para mag-angkon sang pamilya.
Apang suno sa iya, pagkatapos sang proposal, wala sila sa gilayon nagbulaganay.
Nahibaluan nga sa video ni Neil para sa iya audition sa isa ka reality TV show, ginpahayag niya nga mas mabudlay nga bayaan para sa korona.
Suno kay Rabiya, naistoryahan nila ini ni Neil kag nagpangayo na ini sang pasaylo.
Samtang, ginpahayag sang Ilongga beauty queen turned actress nga handa na siya nga mag-angkon sang pamilya sa masunod nga duha ka tuig bangud nga nalab-ot na niya ang iya handum sa iya pamilya.
Sa subong, ang nobyo ni Rabiya amo ang aktor nga si Jeric Gonzales.
Sang 2021, gin-confirm ni Neil nga bulaganay na sila ni Rabiya matapos ang pito ka tuig nga relasyon.
