ILOILO CITY- Ginbawian sang kabuhi ang isa ka retired army matapos nga nabun-an sa Zone 15, Calaparan, Arevalo, Iloilo City.
Ang biktima amo si Joebert Bodiola, 63, samtang ang suspek amo si Mark Losana, 35, isa ka fish vendor.
Sa interview sang Bombo Radyo kay PCpt Resty Labasteda, hepe sang Arevalo Police Station, naga-inom si Losana sa higad sang dalan sang naglabay ang biktima sakay sa iya salakyan kag nagpabati-bati ang suspek.
Nagbaisay ang duha kag sang nagbiya si Bodiola, ginsunod ini sang suspek kag ginbuno sang masobra duha ka beses.
Gindala pa sa ospital ang biktima apang wala na natabangan.
Nadakpan naman ang suspek kag preso na subong sa Arevalo Police Station.
Samtang, ginkakibot naman sang mga kasilingan sang retired army kag fish vendor ang natabo nga insidente.
Sa interview sang Bombo Radyo kay Alyas Boy, iya ginpahayag nga maayo ang nangin relasyon sang duha antes pa man matabo ang krimen.
Suno kay Alyas Boy, sang mismo nga adlaw lang nangin mainit ang tensyon sa tunga sang duha.
