Atubangon sang Gilas Pilipinas ang Lebanon ‘las sais karon sa gab-i sa Philippine Arena sa Bulacan para sa sixth kag final window sang Fiba World Cup Asian Qualifiers.
Pangunahan ni Justin Brownlee ang national team kag ini man ang iya una nga official game bilang isa na ka Filipino citizen.
Makaupod sini sa team sanday six-time Philippine Basketball Association (PBA) Most Valuable Player (MVP) June Mar Fajardo, Mason Amos, Jamie Malonzo, Jordan Heading, CJ Perez, Calvin Oftana, Ray Parks Jr., Dwight Ramos, mag-utod nga Kiefer kag Thirdy Ravena, kag reigning PBA MVP Scottie Thompson.
Wala na sang bearing sa duha ka team ang anuman nga resulta sang hampang bangud pareho ini nga kuwalipikado sa 2023 FIBA World Cup.
Sa pihak sini, ginabantayan gihapon ini sang basketball fans ilabi na bangud tuyo sa gihapon sang Gilas nga makabalos matapos duha ka beses nga ginlutos sang Lebanon sang nagligad nga tuig — hampang sa Indonesia kag hampang sa Beirut. ##
