ILOILO CITY – Ginmanduan ni Iloilo City Mayor Jerry Treñas ang tanan nga mga department heads kag heads of offices sa Iloilo City Hall nga may job hires nga wala pa naswelduhan nga magpasa sang sulat agud ipaathag ang rason sang delay.
Ini matapos nga nagpahayag ini nga bukas ang iya opisina nga mag-istorya sa mga job hires kahapon apang wala sang bisan isa ka landong sang empleyado nga nagpalapit.
Sa interview sang Bombo Radyo kay Mayor Treñas, iya ginpahayag nga apisar special non-working holiday subong nga adlaw, magabalik siya sa iya opisina, alas-nueve sa aga tubtob alas-tres sa hapon kag magahulat sang job hire kag mangin sa masunod pa nga mga inadlaw.
Nagpasalig ang alkalde nga indi ma-terminate ang sin-o man nga magreklamo sa iya opisina.
Nagpaathag man ang natungdan nga nagaka-atrasar ang sweldo sang mga indi regular nga empleyado bangud nga may yara sang kulang nga dokumento sa ila nga payroll.
Bangud sini suno kay Treñas, nagpagwa sang memorandum order si Mr. Melchor Tan, ang city administrator, nga ang job hire nga may kulang nga dokumento ang indi pag-ilakip sa payroll agud nga indi madalahig ang iban nga empleyado.
Magluwas sa paghulat sa mga job hires, yara siya sa iya opisina bangud nga may bisita nga maga-abot halin sa Isabela kag magapadulong man ang local representative sang bag-o nga internet provider sa Pilipinas nga SpaceX.
