ILOILO CITY – Arestado ang apat ka mga indibidwal sa ginpatigayon nga joint drug buy-bust operation sang Philippine Drug Enforcement Agency- Regional Special Enforcement Team VI, Philippine Drug Enforcement Agency- Iloilo, Philippine Drug Enforcement Agency- Iloilo City kag Jaro Police Station sa isa ka ginapatihan drug den sa Barangay Seminario, Jaro, Iloilo City.
Ang target sang operasyon amo si Scott Michael Jimena, 25, residente sang nasambit nga barangay nga amo ang naga-maintain sang drug den.
Arestado man ang ang mga drug den visitors nga sanday:
*Sanny Lanaria, 44, residente sang nasambit nga barangay
*Eugene Fernandez, 47, residente sang Barangay Aguinaldo, La Paz, kag
*Ivan Paitone, 35, residente sang Barangay Manhoy, Dao Capiz.
Nakuha sa mga durugista ang ginabanta 18 grams sang shabu nga may standard drug value nga P122, 400.
Na-recover man sa ginarentahan ni Jimena nga duha ka mga kwarto sa amo nga barangay ang nagkalain-lain nga drug paraphernalia.
Sa interview sang Bombo Radyo kay Philippine Drug Enforcement Agency Investigator Agent Johnny Boy Ybañez, iya ginpahayag nga masobra isa ka bulan nga gin-monitor sang otoridad ang main subject antes nagpatigayon sang operasyon.
Dugang pa niya, madugay na nga nagpa-andam ang mga opisyal sang barangay sa main subject nga nalakip sa listahan sang mga drug surrenderees sa Barangay Anti-Drug Abuse Council.
Ang apat ang gin-turn over na sa custodial facility sang Philippine Drug Enforcement Agency Region VI kag magapangatubang sang kaso nga paglapas Republic Act 9165 ukon ang Comprehensive Dangerous Drugs Act of 2002.
