ILOILO CITY – Gina-finalize na sang Iloilo City government ang tanan nga ruta sang tricycle sa syudad sang Iloilo.
Sa interview sang Bombo Radyo kay Iloilo City Councilor Atty. Sedfrey Cabaluna, chairman sang Committee on Transportation sa Iloilo City Council, iya ginpahayag nga magapasar siya sang mother ordinance nga nagahimo sang 30 ka mga ruta.
Katuyu-an sang ordinansa nga ma-untat na ang pagbyahe sang colorum nga tricycles kag mahatagan sang tsansa nga ma-legalize ang mga ini.
Ang nasambit nga ordinansa ang maga-limit man sang numero sang units nga magabyahe sa amo nga mga ruta agud nga malikawan ang pagginutok sang mga salakyan.
Ipatuman sa amo nga ordinansa ang standard design sa tanan nga tricycle kag istrikto nga sundon ang color coding.
Base sa Regulation Ordinance 2017- 036, ang mga tricycle sa City Proper ang duag green; La Paz – orange; Jaro – blue; Molo – puti; Mandurriao – yellow; Villa – pula kag Lapuz – violet.
Natalana man nga ikonsulta sang komitiba sa Public Safety and Transportation Management Office kag Land Transportation Office kun i-consider ang pagpaagi sang tricycle sa mga national highways.
Base sa guidelines sang Department of Transportation, dapat nga wala sang tricycles nga maga-agi sa national highways nga gina-agyan sang four-wheel vehicles nga may gross vehicle weight nga masobra sa apat ka tonelada kag masobra sa 40 kph ang kadasigon.
Sa pagparehistro sang tricycle sa syudad, ipa-agi anay sa training kag orientation ang mga drivers.
