ILOILO CITY – Indi pa matumod sang kapulisan ang motibo sa natabo nga shooting incident sa Barangay Bagacay, Pototan, Iloilo.
Ang biktima amo si Michael Ryan Mendoza, 38, may asawa kag residente sang Barangay Guinacas sang amo nga banwa.
Ang suspek naman amo si Ian Pedroso, 50, barangay tanod sang nasambit nga barangay.
Sa kuha sang closed circuit television sang barangay, sakay sa motorsiklo ang biktima kag nagpundo sa tyangge sang asawa sang suspek sang hinali lang nga ginpalapitan sang barangay tanod kag gintiro.
Matapos ang insidente, gilayon nga nagpalagyo ang suspek.
Sa interview sang Bombo Radyo kay Police Staff Sergeant Richard Cabucos, imbestigador sang Pototan Municipal Police Station, iya ginpahayag nga may yara sang daan nga hiligut-anon ang duha sang nagligad nga 2019.
Sa impormasyon nga nabaton sang Bombo Radyo, nagapangimon ang suspek sa biktima nga ginatudlo “other man” sang iya asawa.
Apang suno kay Cabucos, indi pa ini makumpirma bangud nga indi pa makuhaan sang impormasyon ang asawa sang suspek.
Indi pa man matumod kun ngaa nagpadulong sa lugar ang biktima.
Suno kay Cabucos, ang biktima ang nagapautang sang kwarta matapos nga nakagwa sa presuhan bangud sa kaso may kaangtanan sa iligal nga droga.
Sa subong, nagapabilin nga kritikal ang biktima sa isa ka ospital sa syudad sang Iloilo.
Padayon pa ang hot pursuit operation sang kapulisan agud nga madakpan ang suspek.
