ILOILO CITY – Hugot nga ginpakamala-ot ni Zarraga, Iloilo Mayor Joefel Soldevilla ang ginpatigayon nga “Bikini Open” sa Barangay Gines kag Tuburan sang amo nga banwa.
Ini ang nag-ugat sa sermon ni Rev. Fr. Rogelio Palmos, Jr., administrator sang Saint Isidore the Farmer Parish sa Zarraga, nga nagpakamalaot sa nasambit nga aktibidad kag nagpaandam nga indi ini magpatigayon sang misa sa amo nga mga barangay.
Sa interview sang Bombo Radyo kay Mayor Soldevilla, iya ginpahayag nga wala niya nauyunan ang pagpasaot sa mga babayi nga halos baraha na lamang ang ginatabon sa pang-ibabaw nga bahin sang iya lawas kag may nagalantaw pa nga mga kabataan.
Ini posible makahatag sang ideya sa mga kabataan suno sa iya nga mahimo man nga makakita sang kwarta nga wala sang panapton.
Dugang pa niya, wala siya sang direkta nga ihibalo sa amo nga aktibidad apang sa impormasyon nga ginpalab-ot sa iya, posible nga isa lang ka organizer ang nagpatigayon sang Bikini Open kag naka-package deal.
Nagpaandam man ini sa mga barangay officials kag organizers nga sa tion nga masulit pa ini, ipa-untat niya sa gilayon.
Indi bikini open
Ginklaro sang mga opisyal sang Barangay Tuburan, Zarraga, Iloilo nga indi “Bikini Open” ang ginpatigayon nga aktibidad sa ila barangay sa bisperas sang ila kapistahan.
Sa interview sang Bombo Radyo kay Barangay Kagawad Nancy Vargas, iya ginpahayag nga beauty pageant ang ila ginpatigayon kag ang pagsuksok sang two piece attire ang kabahin sang swim suit competition.
Suno pa sa iya, antes ginpatigayon ang aktibidad, ginklaro gid nila nga dapat indi bastos ang ila programa bangud nga sila ang mga Katoliko man.
