ILOILO CITY – Ginkwestiyon sang Iloilo Provincial Health Office ang tuman ka atrasado nga remarks sang Department of Health Region VI may kaangtanan sa mga requirements sang mga medical frontliners sa pag-avail sang ila One COVID Allowance sa bulan sang Marso tubtob Abril 2022.
Sa interview sang Bombo Radyo kay Wendel Mercado, Provincial Health Officer 1, iya ginpahayag nga Agosto 2022 pa nag-comply ang provincial government sang tanan nga mga requirements.
Suno kay Mercado, Enero 13, 2023, nag-abiso ang Department of Health Region VI nga ma-release na ang One COVID Allowance pagkaligad sang isa ka semana.
Apang, ginkakibot sang provincial government nga sang Pebrero 15, 2023, anum ka bulan ang nakaligad, ginpahayag sang Department of Health Region VI nga kulang naman ang requirements.
Agud nga mahatag na ang benepisyo, nagpasa nalang liwat sang requirements ang Iloilo Provincial Health Office.
May kaangtanan sini, nagsulat si Iloilo Governor Arthur Defensor, Jr. sa Department of Health Region VI nga naga-follow up sa status sang benepisyo.
Nagahulat man ang probinsya sang update sa memorandum of agreement kun sa diin, ang Iloilo Provincial Health Office na ang maga-release sang benepisyo sang mga healthcare workers.
