ILOILO CITY – Indi lang isa, kundi duha tubtob tatlo ang executive assistant kag department head sa Iloilo City Hall ang ginabati-bati nga nagapang-ipit sang empleyado nga indi mag-utang sa ila.
Sa interview sang Bombo Radyo kay Iloilo City Mayor Jerry Treñas, iya ginpahayag nga ginapa-imbestigaran na niya ini sa Iloilo City Legal Department.
Sa impormasyon nga nabaton sang alkalde, wala gina-renew sang department heads kag Executive Assistant ang kontrata sang empleyado kun indi mag-utang sa ila.
Ang mga empleyado nga may reklamo ang magpakig-angut lamang sa Legal Department sa tion nga nakulbaan sila nga magsugid sa alkalde.
Pahayag pa sang alkalde, nagpanginwala na ang executive assistant nga una nga na-angut sa amo nga issue.
Ang pagpa-utang sa mga empleyado sa Iloilo City Hall ang madugay na nga nagakatabo apang suno sa alkalde, indi na husto nga gamiton sang mga executive assistants kag department heads ang ila nga posisyon agud nga magpang-ipit.
Samtang, ginpatawag ni Iloilo City Mayor Jerry Treñas ang Iloilo City Accounting Office kag Iloilo City Administrator agud nga hambalan kun bala, mahimo na nga makuha ang National Bureau of Investigation nga clearance kag Taxpayer Identification Number nagikan sa Bureau of Internal Revenue.
