Apisar sang 41 puntos nga natipon ni Justin Brownlee agud itib-ong ang Gilas Pilipinas, nagkabos ang national team sang isa gid lamang ka punto sa kamot sang Jordan sa FIBA World Cup Asian Qualifiers sa Philippine Arena sa Bulacan.
Nagtapos ang hampang 91-90 pabor sa foreign team.
Bangud sini, abanse na sa 6-4 win-loss record ang nahimo sang Jordan sa qualifiers nga patas sa Gilas Pilipinas sa team standings sa Group E.
Pareho man nga sulod ang duha ka team sa World Cup.
Kasunod sini, gin-ako ni Gilas Pilipinas coach Chot Reyes nga kulang ang height sang Gilas sang nakaatubang sa mas dalagku nga Jordanians.
Ginalantaw suno kay Reyes ang posibilidad nga magpasulod sang isa pa ka naturalized player kun indi makaupod si Kai Sotto sa main draw sang 2023 FIBA World Cup nga magaumpisa sa Agusto.
Absent ang 7-foot-2 basketball star sa Pilipinas kagab-i bangud bag-o pa lamang ini nakapirma sa Japan B.League.
Apisar yara na si Ange Kouame, kinahanglan suno kay Reyes sang dugang nga bulig kay Brownlee kun mag-atubang na sa mas dalagku nga koponan sa FIBA World Cup.
Gina-huring huring man ang posibilidad nga makabalik sa main draw ang Fil-Am NBA star nga si Jordan Clarkson, apang daku nga milagro kun matabo ini suno kay Reyes.
Una na nga ginpahayag sang Utah Jazz guard nga apisar masako siya sa pagpanguna sa team sa tunga tunga sang NBA season, nagahanda siya pananglitan kinahanglanon siya sang Gilas sa mismo World Cup sa Agusto.##
