Iloilo City – Indi pag kunsintihon ni Iloilo City Mayor Jerry Treñas ang pagpanakit sa mga indibidwal nga nagakadakpan sa mga buy-bust operations sa syudad sang Iloilo.
Ini matapos nga napatay ang isa ka durugista sa Barangay Lanit Jaro, Iloilo City bangud nagbato ini sa mga operatiba.
Ang napatay amo si amo si Jason Espaltero alias “Don- Don”, 32, tumandok sang Antique.
Sa interview sang Bombo Radyo kay Treñas, iya ginpahayag nga siya mismo ang nakaagi man preso, apang wala ini ginsakit sang mga militar.
Suno kay Treñas, sa iya pag-usisa, nakit-an sa body cam sang kapulisan nga nagbato si Espaltero kag may dala nga armas luthang kun sa diin nakapalupok ini.
Ginpahayag sang natungdan nga kun may yara sang reklamo, mahimo ini ipalab-ot sa iya opisina agud mahatagan sang igtalupangod.
Nagpahanumdom naman ang alkalde nga may yara sang iban nga mga interventions agud mabuligan ang mga naangot sa illegal drugs kaangay sa pagtutok sa mental wellness sang mga ini.
