Iloilo – Indi na bag-o ang probinsya sang Iloilo para sa incoming Iloilo Police Provincial Office Director.
Nahibauan nga napilian ni Iloilo Governor Arthur Defensor Jr. si Police Colonel Ronaldo Palomo nga mangin masunod nga Director base sa iya credentials.
Sa exclusive interview sang Bombo Radyo kay Palomo, iya ginpahayag nga tumandok ini sang Passi City kag naghalin sa pamilya sang mangunguma.
Antes magsulod sa serbisyo bilang pulis, naggradwar si Palomo sa Western Institute of Technology kag nakatudlo pa sa St. Joseph School – Hijas de Jesus sa Barangay San Miguel, Jordan, Guimaras.
Suno kay Palomo, nagsulod ini sa Philippine National Police Academy sang 1996 kag nakagradwar sang 1998.
Ginpahayag dugang sang natungdan nga gin-assign ini sa Region 6 kag nagserbe bilang hepe sa mga banwa sang San Miguel, Pototan kag San Enrique, Iloilo.
Gin-assign man si Palomo sa Aklan kag Guimaras, Region 12, kag Region 8.
Sang ginsaylo ini sa Occidental Mindoro, diri na kag napinsaran sini ang schooling agud mangin isa ka full-fledged colonel.
Nakatutok sa subong ang natungdan sa pag-revisit sa mga unsolved cases sa Iloilo.
