Iloilo City – Amat-amat na nga nagakatahap ang mga durugista sa syudad sang Iloilo bangud sa sagunson nga drug buy-bust operations.
Sa interview sang Bombo Radyo kay Police Major Shella Mae Sangrines, spokeserson sang Iloilo City Police Office, iya ginpahayag nga sa 33 ka mga drug operations, 45 nga mga durugista ang napreso.
Suno kay Sangrines, magluwas sa kampanya batok sa iligal nga droga, nangin madinalag-on man ang pagdakop sang 42 ka mga wanted personalities kun sa diin, walo sa mga ini ang ginakabig nga most wanted persons.
Ginpahayag dugang sang natungdan nga ini ang nagapakita sang agresibo nga pagtutok sang mga kapulisan sa idalom sang liderato ni Police Colonel Joeresty Coronica batok sa iligal nga droga, illegal gambling, kag iban nga krimen sa Iloilo City.
Samtang suno kay Sangrines, nagpasalig si Coronica nga padayunon sini ang naumpisahan partikular sa pagpapas sang mga nagagamit sang iligal nga droga.
