ILOILO CITY – Dako ang benepisyo para sa syudad kag probinsya sang Iloilo sang pag-elihir kay Iloilo Fourth District Board Member Atty. Domingo Oso bilang Secretary General sang Provincial Board Members League of the Philippines.
Sa interview sang Bombo Radyo kay Board Member Oso, iya ginpahayag nga ang iya position ang makabig nga working position bangud nga siya ang naga-execute sang mga programa sang liga.
Suno pa sa iya, iduso niya upod kay Iloilo First District Board Member Val Serag nga Regional Chairman sang Western Visayas, nga diri patigayunon sa Iloilo ang Island Congress agud nga ma-promote ang syudad kag probinsya sang Iloilo sa national nga lebel kag makabulig sa mga pumuluyo nga maka-generate sang revenue.
Paagi man sini suno kay Oso, mahibaluan sang pumuluyo sang probinsya nga may ikasarang ang mga board members sa Iloilo nga magtrabaho sa national level.
Nahibaluan nga wala sang kontra si Oso sa amo nga posisyon.
Nagapasalamat man ini sa pagsalig nga ginhatag sa iya kag sa kahigayunan nga magaserbe liwat bilang opisyal sang liga sa iya katapusan nga termino bilang board member.
