ILOILO CITY – Nagdangup sa Bombo Radyo Iloilo ang isa ka empleyado sang Office of Beautification Program agud nga klaruhon ang pangalan sang iya supervisor nga si Mrs. Ninda Atinado sa isyu sang pagpang-ipit sa mga empleyado.
Ini ang kasunod sang paggwa sang pangalan ni Atinado nga wala naga-renew sang job hires nga wala ukon indi mag-utang sa iya.
Sa interview sang Bombo Radyo kay Melchorita Encarnado, 18 na ka tuig nga job hire sa idalom sang Beautification Program, iya ginpahayag nga wala nagapautang si Atinado sa mga empleyado.
Suno sa iya, sa pribado nga indibidwal sila naga-utang kag indi konektado sa Iloilo City Hall.
Dugang pa niya, subong lamang siya nakahibalo nga may yara sang opisyal ang syudad nga nagapang-ipit sa mga job hires.
Sa ila opisina, may yara sang mga ginpang lay-off nga empleyado bangud nga matamad kag masami nga wala nagasulod sa trabaho.
Posible suno sa natungdan nga gin-angut ang pangalan ni Atinado sa isyu bangud sang kahisa sa matahom na nga mga proyekto sang Beautification Program.
Ginpahayag man sini nga kun pahalinon si Atinado bilang chairperson sang opisina, nakahanda man ini nga mag-resign apisar nga kinahanglanon sang iya anak sa presuhan ang iya financial support.
