ILOILO CITY – Nagpanugyan ang Iloilo City Health Office sa publiko nga indi gid pagbutangan sang ano man nga panakot ang pilas nga ginkagat sang sapat.
Sa interview sang Bombo Radyo kay Dr. Maila Buyco, focal person sang Rabies Prevention Program sang Iloilo City Health Office, iya ginpahayag nga ang pagnusnos sang bombay, ahos ukon kapayas ang makadugang pa sang viral load sa pilas.
Suno sa iya, dapat nga hugasan sang naga-ilig nga tubig ang pilas kag butangan sang habon sa sulod sang 10 minutos.
Dugang pa niya, indi gid dapat nga pagpadug-on ang pilas bangud nga posible nga magsulod pa ang virus diri.
Pagkatapos nga mahugasan, butangan sang anti-septics kaangay sang betadine kag magkadto gilayon sa pinakamalapit nga animal bite center agud nga makapabakuna.
Sa Iloilo City, may yara sang animal bite center sa Sto. Rosario Health Center sa Fort San Pedro, sa Western Visayas Medical Center, kag sa pila ka mga pribado nga ospital sa syudad.
