ILOILO CITY – Patay ang graduating student sang University of San Agustin-College of Education matapos nga na-aksidente ang ginasakyan nga motorsiklo sa Diversion Road, Barangay Dungon B, Jaro, Iloilo City.
Ang driver sang motorsiklo ang isa ka 22 anyos nga estudyante nga residente sang Ybiernas St., Iloilo City Proper apang nagatinir sa banwa sang Pavia, Iloilo.
Sa interview sang Bombo Radyo kay Police Staff Sergeant Jeffrey Janay, traffic investigator sang Jaro Police Station, iya ginpahayag nga natingala ang isa ka security guard nga may nagatindog nga motorsiklo sa center island apang wala na sang driver.
Suno pa sa iya, ginabanta 100 meters ang distansya sang motorsiklo kag sang lawas sang biktima.
Sa imbestigasyon sang kapulisan, posible nga nadagdag ang biktima sa motorsiklo kag naglampos ang lawas sini sa center island.
Ang helmet sang biktima ang nakita na sa pihak nga lane.
Sa subong, padayon pa ang imbestigasyon sang kapulisan may kaangtanan sa natabo nga aksidente.
