ILOILO CITY – Ginkalipay sang Iloilo Science and Technology University ang pagkalakip sang ila nga alumnus sa top 10 sang Mechanical Engineers Licensure Examination.
Si Nikko Perez Martirizar nga graduate sang unibersidad sang 2022 ang top 4 sa amo nga pasinawan.
Magluwas kay Martirizar, ang Iloilo Science and Technology University ang nagapangaduha sa Top Performing Schools nga may passing percentage nga 97%.
Sa 45 nga nagkuha sang exam sang Pebrero 26 kag 27, isa gid lamang ang wala nakapasar halin sa amo nga unibersidad.
Sa interview sang Bombo Radyo kay Dr. Raul Muyong, presidente sang unibersidad, iya ginpahayag nga isa ka dako nga accomplishment nga dapat nga ikalipay kag ipabugal ang pagkalakip ni Martirizar sa top 10.
Samtang, ang 44 nga mga nakapasar ang lunsay first takers.
Bangud sini, may nagahulat nga testimonial dinner para sa mga nakapasar kag may monetary incentive para kay Martirizar.
Sa ila nga pagsulundan, si Martirizar ang makabaton sang P25, 000.
Ang kadalag-an sang unibersidad ang bangud sa state of the art facilities, sa manami nga mga manunudlo kag sa kalidad sang mga estudyante nga naga-enroll.
